हेटौंडा टुडे
मकवानपुरको इन्द्रसरोवर गाउँपालिकाको सुविधा सम्पन्न प्रशासकिय भवन निर्माण हुने भएको छ । प्रशासकिय भवन निर्माण गर्नका लागि आज राष्ट्रिय दैनिक पत्रिकामा ठेक्का समेत निस्कीएको छ । गाउँपालिकाको प्रशासकिय भवन, इजलास, पर्खाल समेत गरेर १२ करोड ३४ लाख रुपैयाँमा ठेक्का आवहान गरिएको गाउँपालिकाका इन्जिनियर आदर्श पोख्रेलले वताउनुभयो ।
साढे दुइवर्ष भित्रमा भवन निर्माण गरिसक्ने लक्ष राखिएको छ । प्रशासकिय भवन पाँच तलाको निर्माण गर्न लागिएको उहाँले जानकारी दिनुभयो । इन्द्रसरोवर गाउँपालिका वडा नम्बर–२ खानीखेतमा भवन निर्माण गर्न लागिएको हो ।
एउटा हल सहित ४० वटा कोठा निर्माण गर्न लागिएको उहाँले वताउनुभयो । संघीय सरकारले भवन निर्माण गर्नका लागि मात्र ५ करोड ४० लाख सहयोग गरेको छ । अरु रकम गाउँपालिकाले खर्च गर्ने भएको छ । अहिले साघुरो भवनमा काम गर्नुपर्ने बाध्यतामा रहेको गाउँपालिकाको भवन पर्याप्त कोठा, हलसहितको सुबिधाको निर्माण गरिने भएको छ । गाउँपालिकामा इजलास, बाहिर सार्वजनिक सौचालय, पर्खाल समेत निर्माण गरिने इन्जिनियर पोख्रेलले वताउनुभयो ।
