हेटौंडा टुडे
हेटौंडा। बागमती प्रदेशका भौतिक पूर्वाधार विकास राज्यमन्त्री सन्तबहादुर प्रजाले बाढी पहिरोबाट विस्थापित बनी वर्षौंदेखि मनहरी गाउँपालिका ६ र ७ मा बसोबास गर्दै आएकाहरुलाई यथाशीघ्र लालपूर्जा वितरण गर्न आग्रह गरेका छन् ।
राज्यमन्त्री प्रजाले बिहीबार भूमि सम्बन्धी समस्या समाधान आयोग मकवानपुरलाई पत्र लेख्दै २०५९ सालको बाढी पहिरोमा राक्सिराङ र कैलाश गाउँपालिकाबाट विस्थापित भई आएका र अन्यत्रबाट विस्थापित भई मकवानपुरको मनहरी गाउँपालिका ६ र ७ को जोगीताल, खयरघारी, बिजौना, निर्मलबस्ती, लामाबस्ती, डिपाट, रमन्टार, कत्ले खोलामा बसोबास गर्दै आएका भूमिहीनलाई तत्काल लालपूर्जा वितरणको प्रक्रिया सुरु गर्न आग्रह गरेका हुन् ।
लामो समयदेखि जग्गाको भोगचलन गर्दै आएता पनि आफूहरुले लालपूर्जा पाउन नसकेको भन्दै स्थानीयबाट बारम्बार गुनासो आएकोले उनीहरुको समस्या समाधानमा काम गर्न आयोगलाई आग्रह गरिएको छ । मनहरीको ६ र ७ का विभिन्न बस्तीमा करिब तीन हजार पाँचसय परिवार भूमिहीन सुकुम्बासीहरु बसोबास रहेको बताइएको छ । मनहरी गाउँपालिकाले यसअघि भूमिहीनको लगत संकलनसमेत गरिसकेको छ । पर्सा राष्ट्रिय निकुञ्ज, डिभिजन वन कार्यालय र मनहरी गाउँपालिकासँग समन्वय गरी जतिसक्दो छिटो भूमिहीनलाई लालपूर्जा वितरणको काम अघि बढाउन राज्यमन्त्री प्रजाले आग्रह गरे ।
