हेटौंडा टुडे
हेटौंडा|मकवानपुर प्रहरीले लागूऔषध गाँजासहित गएराति एक जना युवकलाई पक्राउ गरेको छ । प्रहरीले पूर्व–पश्चिम सडकखण्ड अन्तरगत पर्ने मनहरी गाउँपालिका वडा नम्वर ९ ज्यामिरेस्थित किनाराबाट लागूऔषध गाँजा १५८ किलोसहित एक जना युवकलाई पक्राउ गरेको जनाएको छ ।
पक्राउ पर्नेमा मकवानपुरको थाहा ननगरपालिका वडा नम्वर ३ गोपालीगाउँ बस्ने अन्दाजी १८ वर्षीय बिशाल गोपाली रहेको जिल्ला प्रहरी कार्यालय मकवानपुरका प्रहरी नायव उपरीक्षक टेकबहादुर कार्कीले जानकारी दिए ।
प्रहरी नायव उपरीक्षक कार्कीका अनुसार, गएराति साढे ११ बजेको समयमा पालुङबाट आई रोकिराखेको ना ६ ख ४५२० नम्वरको डिब्बा ट्रकलाई सशस्र प्रहरी बल नेपाल आई.आर.टी पोष्ट कत्लेखोलाबाट खटिएको प्रहरी गस्ति टोलीलेदेखी चेकजाँच गर्दा डिब्बा ट्रकको क्याबिनमा लुकाई छिपाई ल्याएको सो परिमाणको गाँजा फेला परेको हो । प्रहरीले ट्रकका सहचालक गोपालीलाई सोही स्थान नजिकैबाट पक्राउ गरेको र चालक फरार रहेका छन् ।
प्रहरीले पक्राउ परेका गोपाली र ट्रकलाई आवश्यक अनुसन्धानको लागि जिल्ला प्रहरी कार्यालयमा ल्याइएको छ भने ट्रक चालकको खोजीकार्य जारी गरेको प्रहरी नायव उपरीक्षक कार्कीले बताए ।
