हेटौंडा टुडे
हेटौंडा । यही फागुन २७ गतेबाट हेटौंडामा वडा स्तरीय प्रथम मोहन श्रेष्ठ (घट्टे मोहन) स्मृति एट ए साइड भेट्रान्स रनिङ कप नकाउट फुटबल प्रतियोगिता हुने भएको छ । हेटौंडा ९ मा रहेको पशुपति युवा क्लवले पूर्व खेलाडी श्रेष्ठको स्मृतिमा भेट्रान्स फुटबलको आयोजना गर्न लागेको हो ।
हेटौंडा ८ स्थित औद्योगिक क्षेत्रको खेल मैदानमा हुने प्रतियोगितामा हेटौंडा उपमहानगरपालिका भित्रका वडाहरुले सहभागिता जनाउन पाउने आयोजक क्लवका अध्यक्ष राजकुमार श्रेष्ठले जानकारी दिए ।
प्रतियोगिताको विजेताले एकलाख ५ हजार ५५५ तथा उपविजेताले ५५ हजार ५५५ रुपैयाँसहित ट्रफी प्राप्त गर्नेछन् । यस्तै विधागत उत्कृष्ट खेलाडी तथा प्रशिक्षकलाई जनही नगद ५ हजार ५५५ रुपैयाँ प्रदान गरिने आयोजकले जानकारी दिएको छ ।
प्रतियोगिताको तयारीलाई तीव्र पारिएको आयोजक पशुपति युवा क्लवका सचिव असिनलाल श्रेष्ठले जानकारी दिए । पूर्व खेलाडीको योगदानलाई जीवन्त राख्दै खेलकुदको विकास एवम् भ्रातृत्वका लागि प्रतियोगिता गर्न लागेको आयोजकले जानकारी दिएको छ ।
