हेटौंडा टुडे
हेटौंडा| राष्ट्रिय स्वतन्त्र पार्टी (रास्वपा) का निवर्तमान सांसद ढाकाकुमार श्रेष्ठको ठाउँमा विन्दवासिनी कंसाकारलाई प्रतिनिधि सभा सदस्य पदको शपथ लिने बाटो खुलेको छ ।
मेडिकल शिक्षा व्यवसायी दुर्गा प्रसााईसँग दुई करोड माग गरेको अडियो सार्वजनिक भएपछि रास्वपाले सांसद ढाकाकुमार श्रेष्ठलाई निष्कासन गरेर उनको ठाउँमा कंसाकारलाई समानुपातिक सांसद बनाउन सिफारिस गरेको थियो ।
रास्वपाको सिफारिस अनुसार, निर्वाचन आयोगले कंसाकारलाई समानुपातिक निर्वाचन प्रणालीतर्फ निर्वाचित भएको प्रमाणपत्र दिइसकेको छ । उनी निर्वाचित भएको पत्र निर्वाचन आयोगबाट संसद सचिवालयमा समेत पुगिसकेको छ ।
तर, आफूलाई गरेको कारबाही कानूनसम्मत नरहेको भन्दै ढाका कुमार श्रेष्ठले सर्वोच्चमा रिट दिएका थिए । उनको रिटमाथि सुनुवाइ गर्दै गत वैशाख २५ गते न्यायाधीश तिलप्रसाद श्रेष्ठको एकल इजलासले कंसाकारलाई सांसद पदमा निर्वाचित गर्ने आयोगको निर्णय यथास्थितिमा राख्न अल्पकालीन अन्तरिम आदेश जारी गरेका थिए ।
बुधबार सोही रिटमा न्यायाधीशद्वय कुमार रेग्मी र नहकुल सुवेदीको इजलासले ढाका कुमारको रिटमा अन्तरिम आदेश दिन अस्वीकार गरेको छ । यो सँगै कंसाकारले सांसदको शपथ लिने बाटो खुलेको हो ।
