मनहरीमा जङ्गली हात्तीको आतंक, ३ घरमा क्षति

हेटौंडा ।  मनहरी गाउँपालिकामा जंगली हात्तीले शुक्रवार राति आतंक मच्चाएको छ। जङ्गली हात्तीले मनहरी गाउँपालिका –७ शान्तिटोल र ८ नं. सिमपानीका घरमा क्षति गरेको हो । हात्तीले शुक्रवार राती ११ बजे मनहरी गाउँपालिका वडा . ७ शन्तिटोलका संजय साहको काठको घरको ढोका भत्काई घर भित्र रहेको एक बोरा धान खाएको छ भने सोही स्थानकी लक्ष्मी परियारको ब्लकले बनेको जस्ताले छाएको एक तले घरको एक साईडको भित्ता भत्काएको  मकवानपुर प्रहरीले जनाएको  छ । त्यस्तै वडा नं. ८ सिमपानीमा शिबलाल प्रजाको ब्लकले बनेको जस्ताले छाएको एक तले घरको छानो र एक साईडको भित्ता भत्काई हात्तीले एक बोरा चामल खाएको छ । पर्सा राष्ट्रिय निकुञ्जबाट नेपाली सेना, प्रहरी र स्थानीयवासीको सहयोगमा हात्तीलाई जङ्गलतर्फ लखेटिएको र जङ्गली हात्तीका कारण मानवीय क्षति भने नभएको प्रहरीले जनाएको छ ।