हेटौंडा टुडे
हेटौंडा । स्थानीय तह छैठौं सहिद स्मृति अन्तर्राष्ट्रिय मकवानपुर गोल्डकप फुटबल प्रतियोगिता – २०८० माघको दोस्रो साताबाट हुने भएको छ । माघ १६ गतेबाट २७ गतेसम्म जिल्ला फुटबल संघ मकवानपुरको आयोजनामा प्रतियोगिता सञ्चालन हुने भएको हो । यस वर्ष प्रतियोगितामा आयोजक सहित आठ वटा ए डिभिजन, एउटा विदेशी, दुईवटा मोफासलका क्लबहरु सहभागी हुने आयोजकले जनाएको छ ।
संघ अध्यक्ष टिकाराम लामाका अनुसार प्रतियोगितामा ए डिभिजनका चर्च व्वाइज, संकटा, हिमालयन शेर्पा, त्रिभुवन आर्मी क्लब, नेपाल पुलिस क्लब, मच्छिन्द्र, मनाङ मर्स्याङदी र थ्रीस्टार क्लब सहभागी हुनेछन् । प्रतियोगितामा भुटानको पारो एफसी, सर्लाहीको वाग्मती युथ क्लब र धनकुटाको राजारानी क्लब सहभागी हुनेछन् । आयोजकले रिगल हेटौंडा रिसोर्टको नाममा सहभागी हुने भएको छ ।
हेटौंडा–६ स्थित गौरिटार रंगशालामा हुने प्रतियोगिताको विजेताले नगद १५ लाख, उपविजेताले १० लाख रुपैयाँ प्राप्त गर्नेछन् । सर्वोत्कृष्ट खेलाडीलाई यसवर्ष पनि करिब ५ लाख रुपैयाँ बराबरको बुलेट मोटरसाइकल प्रदान गरिने भएको छ । मोटरसाइकलको प्रायोजन पर्शराम स्मृति प्रतिष्ठानले गरेको लामाले बताए ।
प्रतियोगितामा विधागतरुपमा उत्कृष्ट गोलरक्षक, डिफेन्डर, मिडफिल्डर, फरवार्ड र प्रशिक्षकलाई जनही २५ हजार रुपैयाँ तथा प्रत्येक खेलको म्यान अफ दी म्याचलाई दशहजार रुपैयाँ नगद पुरस्कारको व्यवस्था गरिएको शुक्रबार आयोजित पत्रकार सम्मेलनमा जानकारी दिइएको छ ।
