हेटौंडा टुडे
हेटौंडा|नेपाली कांग्रेस बागमती प्रदेशका पदाधिकारीहरुले संघीय लोकतान्त्रिक गणतन्त्र नेपालको नवनिर्वाचित राष्ट्रपति रामचन्द्र पौडेललाई आईतबार बधाई तथा शुभकामना दिएका छन् । iकांग्रेस बागमती प्रदेश सभापति ईन्द्रबहादुर बानियाँले राष्ट्रपति भवन शीतल निवासमा पुगेर नवनिर्वाचित राष्ट्रपतिलाई बधाई तथा शुभकामना दिएका हुन् ।
नेता बानियाँले प्रजातन्त्र प्राप्तिको लागि निरन्तर संघर्ष र संघीय लोकतान्त्रिक गणतन्त्रको लागि अहँम भूमिका खेलेको बताउँदै राष्ट्रपतिले आमजनताको जनभावना अनुरुप कार्य गर्दा राष्ट्रिय तथा अन्तर्राष्ट्रियस्तरमा समेत उच्चस्थान हाँसिल गर्नेमा आम नेपाली जनता बिश्वस्त रहेको बताए ।
संघीय लोकतान्त्रिक गणतन्त्र नेपालको गरिमामय तेस्रो राष्ट्रपतिको रुपमा निर्वाचित भएपश्चात भएका कार्यक्रमहरुमा आफूले निर्वाचित हुनु अगावै गरेको केही प्रतिवद्धता पूरा गरेर जनताको मन जित्न सुरु गरेको बताए । बानियाँले यो पाँच वर्षे कार्यकालमा गरिमामय राष्ट्रपति पदको भूमिका अब्बलरुपमा निर्वाह गर्नेमा पूर्ण विश्वास रहेको बताए ।
नेपाली कांग्रेसका वरिष्ठ नेता पौडेल फागुन २५ गते भएको राष्ट्रपति निर्वाचनमा सत्ता गठबन्धनको तर्फबाट संघीय लोकतान्त्रिक गणतन्त्र नेपालको तेस्रो राष्ट्रपतिकोरुपमा निर्वाचित भएका थिए ।
